မောင်မောင်နိုင်ပြီ ထင်လို့လား?

ဦးဖိုးသာအောင်

-၆-၁၁ -၂၀၁၁



x ကမ္ဘာကြီးပြားသွားပြီ

x ဘာလင်တံတိုင်းကြီးလည်း ပြိုသွားပြီ

x ဆိုဗီယက် အင်ပါယာ ပြိုကွဲသွားပြီ

x စစ်အေးတိုက်ပွဲလည်း တဘက်သတ်အနိုင်ဖြင့် ပြီးသွားပြီ

x သမိုင်းတစ်ခေတ် နိဂုံးချုပ်ခဲ့ပြီ

ကမ္ဘာ့နိုင်ငံရေး ရေစီးကြောင်းသည် အသစ်အသစ်သော နယ်ပယ်များကို ဖြတ်သန်းစီးဆင်းမြဲဖြစ်သည်၊

အသစ်အသစ်သော လောကဓံများကို ဆက်လက်ရင်ဆိုင် ဖြတ်သန်းနေဆဲ ဖြစ်သည်၊



သည်ကွေ့သည်တက်နှင့်လှော်ဆိုသည့် မြန်မာစကားပုံသည် အမှန်တရားကို အချိန်နှင့် တပြေးညီ ရှာဖွေနိုင်ရန် ဆုံးမနေသည် မဟုတ်ပါလား၊

လူတွေနှင့် မဆီလျော် မကိုက်ညီတော့သည့် အယူအစွဲများကို စွန့်လွှတ်ကြရန် နှိုးဆော်တိုက်တွန်းနေပါသည်၊

သမိုင်းနိဂုံး ချုပ်ပြီဆိုသည့် အယူအဆကို လက်မခံနိုင်သည့် သူများအတွက် နေရာပျောက်နေပြီကို သတိချပ်သင့်ကြပေသည်။



မြန်မာပြည်တွင်လည်း သမိုင်းတစ်ခေတ် နိဂုံးချုပ်တော့မည်၊ သမိုင်းဟောင်းကို ရင်ဝယ်ပိုက်နေသည့် သက်ရှိသက်မဲ့ ပစ္စည်းများအားလုံးကို ယဉ်ကျေးမှုသမိုင်းပြတိုက်သို့ ပို့ရန် အသင့်ဖြစ်နေကြပါပြီ၊



ရဲဘော်ကြီး ဂိုရှယ်(ခ)ဘတင် ယူဆောင်တင်သွင်းလာသည့် ကားလ်မာက္ခစ်၏ အရင်းကျမ်းကြီးနှင့် ကွန်မြူနစ်ကြေငြာစာတမ်းတို့သည် ပဲကြီးလှော် ထုတ်သည့် စက္ကူအဖြစ်သို့ လျှောကျပြောင်းလဲ သွားပြီဖြစ်သည်၊



ဤသည်တို့နှင့် အတူ မြန်မာ့ဒီမိုကရေစီရေး တရေးနိုးလာပြီ၊ ခေတ်နှင့်အညီတိုးတက်သစ်လွင်သည့် သဘောတရား များကို နားလည်လက်ခံလာကြသည့် မျိုးဆက် ဟောင်း၊ မျိုးဆက်သစ်များလည်း ထွန်းကားလာနေပါသည်၊

အားကောင်းရန် အလားအလာများကိုလည်း မြင်တွေ့ နေရပါသည်။



စစ်အေးတိုက်ပွဲကာလတွင် တရုတ်ကွန်မြူနစ်တိုင်းပြည်ကြီး၏ ဘေးနားမှာကပ်နေသည့် မြန်မာပြည်ကို မြန်မာ ကွန်မြူနစ်နိုင်ငံ မဖြစ်ရေးသည် အမေရိကန်အတွက် အလွန်အရေး ပါတဲ့ကိစ္စ ဖြစ်သဖြင့် စစ်အာဏာရှင်ဗိုလ်နေဝင်းကို အားပေး တွန်းတင်ပြီး ကွန်မြူနစ်နိုင်ငံ မဖြစ်ရေးအတွက် ဆောင်ရွက်အားပေးခဲ့ပါသည်၊



စစ်အေးတိုက်ပွဲကာလ ပြီးဆုံးတဲ့အချိန်မှာတော့ စစ်အာဏာရှင်စနစ်ကြီးတခု မြန်မာပြည်မှာ အဖတ်တင် ကျန်ရစ်ခဲ့ ရပြီး မြန်မာပြည်လည်း ခရုဆန်ကျွတ် ဖွတ်ကျောပြာစု ဖြစ်ခဲ့ရပါတော့သည်၊



မြန်မာပြည်သည် ကွန်မြူနစ်နိုင်ငံတခုဖြစ်လာလျှင်လည်း တရုတ်ပြည်ကြီး၏ လက်ဝဲတော်ရံ မြောက်ကိုရီးယားလို လင်္ကျာတော်ရံ ပြည်မြန်မာတခု ဖြစ်လာပြီး နုးကလီးယားပိုင် ဖွတ်မွဲ နိုင်ငံဖြစ်မည်မှာ မလွဲပါ။



စစ်အာဏာရှင်၏ ဖိနှိပ်မှုဒဏ်ကြောင့် အုံကြွတော်လှန်ခဲ့ကြသည့် မြန်မာပြည်သူတို့နှင့်အတူ ဒေါ်အောင်ဆန်းစုကြည်လည်း တိုက်ပွဲတွင်းမှာ ပေါ်ထွန်းလာခဲ့ပါသည်၊

လူထု၏ ထောက်ခံမှုကို အပြည့်အဝ ရရှိခဲ့သည့် ဒေါ်စုနှင့် သူမ၏ ပါတီသည် အမေရိကန်အတွက် မဟာမိတ်ဖြစ်ရန် မျှော်လင့်ကြိုဆို ခဲ့သော်လည်း အမေရိကန်အတွက် တွက်ခြေမကိုင်ဘဲ နှစ်တွေသာကြာညောင်းခဲ့ ရပါတော့သည်၊



ယခင်က သူအားပေးခဲ့သည့် စစ်အာဏာရှင်တို့သည်လည်း အင်အားကြီးတရုတ်ကွန်မြူနစ်နှင့်ပေါင်းကာ အာဏာနှင့် စည်းစိမ်ကို ကာကွယ် နေရသည့် အခြေအနေကို ရောက်ခဲ့ကြပါသည်၊



စစ်အာဏာရှင်အဟောင်းနှင့် အသစ်တို့သည် သူတို့၏အာဏာကို ကာကွယ်ရန်အတွက် တရုတ်နှင့် အလွန်အကျွံပေါင်းမိသည့် အခြေသို့ပင် ဆိုက်ခဲ့ကြပါတော့သည်၊

ရင်းမြစ်သယံဇာတတို့ကို အိုးရောင်းခွက်ရောင်း ရောင်းရခြင်း၊ နှစ်ရှည်စာချုပ်စာတမ်းများဖြင့် ရင်းနှီးမြှုပ်နှံမှုများ ခွင့်ပြုကြရခြင်းများအပြင် တရုတ်များမြန်မာပြည်ထဲတွင် အလွယ်တကူနေထိုင် စီးပွားရှာခွင့်များကိုပါ လိုက်လျှောရခြင်းများအထိ ပေးဆပ်ကြရ သည်အဖြစ်များပါ ဖြစ်နေပါ တော့သည်။



အမေရိကန်တို့အတွက် မြန်မာအတိုက်အခံများကလည်း သူတို့ဘက်ကိုမပါ၊

စစ်အစိုးရကလည်း တရုတ်ဘက်ကို ရောက်သထက်ရောက်သွားပြီး ကျွံသထက်ကျွံရတော့မည့် အခြေအနေတွင် အမေရိကန်၏ မြန်မာအပေါ် ဆက်ဆံရေးမူဝါဒကိုလည်း ပြန်လည်သုံးသပ်ရပါတော့သည်၊

ဒီအထဲမှာ အမေရိကန်တို့အတွက် ဦးစားပေးဆောင်ရွက်ရမည့် အာရပ်လှိုင်း ပြဿနာများ၊ အာဖဂန်ကိစ္စ စသည်များကလည်း မြန်မာ့အရေးကို နောက်ဆုတ်စေခဲ့ပါသည်၊ ၂၀၁၁ ခု နှစ်ကုန်ပိုင်းတွင် အာရပ်လှိုင်းအရေးမှာလည်း အမေရိကန်တို့အတွက် ရတက်မအေးဖြစ်စရာ မလိုတော့ပါ၊

အာဖဂန်နှင့် ပါကစ္စတန်ဘက်မှာလည်း ပြေလည်မှုတခု ရယူနိုင်သည့် အခြေအနေရှိနေပါသည်၊ ဒါကြောင့် အရှေ့တောင်အာရှက မြန်မာ့အရေး ကို ဂရုစိုက်ရန်ဖြစ်လာပါသည်၊



တပြိုင်နက်တည်းမှာ တရုတ်၏ ပင်လယ်ပြင်အငြင်းပွားမှုပြဿနာများနှင့် တရုတ်ငွေကြေးတန်ဖိုးချထားခြင်း ကိစ္စများနှင့် ကုန်သွယ်ရေး မညီမျှမှုတို့အပေါ် ပြန်လည်တုံ့ပြန်လာခြင်းများ ပေါ်ပေါက်လာပြီး တရုတ်အတွက် အခက်တခု ရင်ဆိုင်နေရတဲ့အချိန် ဖြစ်နေပါသည်။



မြန်မာအတိုက်အခံအဖွဲ့များထဲတွင် အကြီးဆုံးနှင့် အရေးပါဆုံးဖြစ်သည့် အမျိုးသားဒီမိုကရေစီ အဖွဲ့ချုပ်သည် အမေရိကန်နှင့် အနောက်အုပ်စုဘက်သို့ မျက်နှာမမူဘဲ မိမိတို့ဖာသာ ရပ်တည် လှုပ်ရှားနေသည်မှာ နှစ်ပေါင်းနှစ်ဆယ်ကျော်ခဲ့ပါပြီ၊ ဤသို့ဖြစ်ရသည်မှာ ဒီချုပ် ပါတီ ဝင် လူကြီးများ၏ အယူအဆကြောင့်ဟု ဆိုလျှင် မှားမည် မထင်ပါ၊ ပါတီတွင်းတွင်လည်း လွတ်လပ်စွာ သဘောထားကွဲလွဲခွင့်ရှိသည့်အတိုင်း အနောက်ဘက်ကို လှည့်ချင်သူနှင့် ဆန့်ကျင်သူတို့၏ အားပြိုင်မှုလည်း ရှိနေမည် အမှန်ဖြစ်ပါသည်။



မြန်မာ့နိုင်ငံရေးသမိုင်းသည် ဗမာကွန်မြူနစ်သမိုင်းနှင့် ခွဲလို့မရသည့်အတိုင်း နေရာတိုင်းအဖွဲ့တိုင်းမှာ လက်ဝဲအားသန်သူ၊ အနောက်ဆန့်ကျင်သူများရှိနေခြင်း၊ အဓိကကျသည့် နေရာများတွင်နေရာယူနိုင်ခြင်းများကိုလည်း တွေ့နေရပါသည်၊

ဗမာပြည်ကွန်မြူနစ်ပါတီကတော့ အင်အားချိနဲ့သွားသော်လည်း မြေအောက်ယူဂျီသဏ္ဍန်ဖြင့် အနောက်ဆန့်ကျင်ရေးကို ပြောင်ပြောင် တင်းတင်း ကြွေးကြော်လုပ်ကိုင်ပါသည်၊

အမေရိကန်တပ်ကြီး ဝင်လာလျှင် စစ်အစိုးရနှင့်ပေါင်းပြီး ပြန်တိုက်မည်ဟုပင် ဆိုခဲ့ကြပါသည်၊

ပြည်တွင်းပြည်ပအတိုက်အခံ အဖွဲ့အစည်း အသီးသီးတို့တွင်လည်း လက်ဝဲသန်သူများနှင့် ဗ.က.ပ ယူဂျီများသည် စစ်အာဏာရှင် စနစ် တိုက်ဖျက်ရေးသည် ဒုတိယ၊ အနောက်အုပ်စုမဝင်ရေးသည် ပထမ နေရာမှာထားပြီးလှုပ်ရှားနေခဲ့ကြပါသည်၊



မော်ဝါဒီလက်ကျန် ဗ.က.ပ တို့၏ သြဇာသက်ရောက်မှုသည်လည်း ထိရောက်သည်ကိုတွေ့ရှိနိုင်ပါသည်၊

အဖွဲ့အစည်းများသာမက မီဒီယာကြီးငယ်များထဲတွင်လည်း ထိုးဖောက်နိုင်သည်မှာ သိပ်တော့မဆန်းလှပါ၊
နှစ်ပေါင်းနှစ်ဆယ်လောက် အမေရိကန်နှင့် အနောက်အင်အားစုတွေ မဝင်နိုင်ဘဲ မြန်မာနိုင်ငံသည် တရုတ်၏ စီးပွားရေးနှင့် လူမျိုးရေး လွှမ်းမိုးမှု ကြီးထွားလာနေသည့်အပေါ် အဆိုးမြင်အဖြစ်မသုံးသပ်နိုင်ကြသည့် လက်ဝဲ ယိမ်းတို့သည် သူတို့ကိုင်စွဲထားသည့် လမ်းစဉ်သဘောတရား အတိုင်း ဖြစ်နေကြဟန်တူပါသည်၊


ဒါကြောင့်လည်း မည်သည့်အင်အားစု၏ အကူအညီမပါသည့် လူထုတိုက်ပွဲသက်သက် ဖော်ဆောင်ရေးကိုသာ မိုက်မဲစွာ စိတ်ကူးယဉ်လျှက် ရှိနေကြ ပါသည်။


အင်အယ်ဒီကို ဝိုင်းရံကြဆိုတဲ့ ဆိုင်းပုဒ်ရဲ့အောက်မှာ အင်အယ်ဒီသည် မည်သည့် အနောက်အင်အားစုနှင့်မှ မပူးပေါင်းရေး၊ မရောနှောရေးအတွက် ကြိုးပမ်းခဲ့သည့် လက်ဝဲယိမ်းအုပ်စုများသည် နှစ်ပေါင်းနှစ်ဆယ်လောက်အထိ အောင်မြင်သည်ဟု ဆိုရပါမည်၊ ရှစ်ဆယ့်ရှစ် နောက်ပိုင်း ကိုးဆယ်ခုနှစ်ရွေးကောက်ပွဲ မဝင်ရေးအတွက် ဗ.က.ပ တို့ ကြိုးပန်းမှု မအောင်မြင်ခဲ့ပေမယ့်၊ အင်အယ်ဒီကို လုံးဝမခွဲခွာတော့ပဲ နေခဲ့ပါသည်၊ စစ်အစိုးရ၏ Road Map ခုနှစ်ချက်ကိုလည်း တချက်တလေမှ ရိုက်ချိုးနိုင်ခြင်း မရှိခဲ့သည့်အပြင် တရုတ်နှင့်နီးစပ်လာမှု အပေါ် ဘာမျှပြောဆိုခြင်းလည်း မတွေ့ခဲ့ရပါ။



အာရပ်လှိုင်းတွေရိုက်ခတ်မှု၏ အောင်ပွဲများနှင့်အတူ မြန်မာ့ဒီမိုကရေစီရေးမှာလည်း တစ်ဆစ်ချိုးပြောင်းလဲမည့် အရိပ်အရောင်များ မြင်နေရပါပြီ၊ ရဲဘော်ကြီး ဖိုးသံချောင်းရဲ့ မချိတဲ့အသံနဲ့ ပြောလိုက်တဲ့ “ ဒီတခါ ထဘီလုပွဲမှာ အမေရိကန်တွေ ရသွားပြီ ” ဆိုတဲ့ စကားသည် မြန်မာ့ဒီမိုကရေစီရေးအောင်ပွဲအတွက် ပွဲဦးထွက်မင်္ဂလာစည်သံသဘွယ် ဖြစ်ရပါတော့သည်၊



အင်အယ်ဒီအတွင်းရေးမှူး လူထုခေါင်းဆောင် ဒေါ်အောင်ဆန်းစုကြည်နှင့် အမေရိကန်တို့ ပလဲနံပတ်သင့် သွားခြင်းနှင့်အတူ လွတ်လပ်သည့် ဈေးကွက်စီးပွားရေးစနစ်ကို ဖော်ဆောင်ပါမည်ဟု ကြွေးကြော် အကောင်အထည် ဖော်ရာတွင် ထွက်ပေါက်ပိတ် အကြပ်ရိုက်လာသည့် အစိုးရ သစ်၏ ထွက်ပေါက်မှာလည်း အနောက်ဘက်မှာ သာရှိကြောင်း နားလည်လာချိန်တွင် သမတကြီးဦးသိန်းစိန်၊ ဒေါ်အောင်ဆန်းစုကြည်နှင့် အမေရိကန် (စိန် စု ကန်) သဟဇာတဖြစ်သည့် ကိန်းကိုလည်း ဆိုက်နေပြန်ပါသည်၊


ဤအခြေအနေသည် ခိုင်မာမှုရှိခြင်း မရှိခြင်းကို စောင့်ကြည့်ရမည့် အချက်သည် အင်အယ်ဒီက ရွေးကောက်ပွဲဝင်ခြင်း မဝင်ခြင်းပင် ဖြစ်နေ ပါသည်။


အင်အယ်ဒီရွေးကောက်ပွဲ ဝင်ရေး မဝင်ရေးမှာလည်း သဘာဝအတိုင်း အားပြိုင်မှုများရှိနေမည် ဖြစ်ပါသည်၊ မဝင်ရေးဘက် က အမှန်အကန်ထောက်ပြကြမည့် အဓိကအချက်များမှာ စစ်အာဏာသက်ဆိုးရှည်စေမည့် ၂၀၀၈ အခြေခံဥပဒေ၊ မတရားသဖြင့် ရယူထားသည့် ၂၀၁၀ ရွေးကောက်ပွဲရလာဒ်၊ ၉၀ ခုနှစ်က စစ်မှန်သည့် ရွေးကောက်ပွဲရလာဒ်ကို မတရားဖျက်ဆီးထားခြင်းနှင့် ဥပဒေ အထက်က စစ်တပ်ရှိ နေခြင်းတို့ပင် ဖြစ်သည်။



အင်အယ်ဒီပါတီ ရွေးကောက်ပွဲဝင်ရန် မှတ်ပုံတင်ရေးဘက်က ထောက်ပြကြမည့်အချက်မှာ ၂၀၀၈ အခြေခံဥပဒေနှင့် အစိုးရသစ်သည် မည်သို့ပင်အထက်စီး အသာစီးမှာ ရှိနေစေကာမူ ဝင်၍ပြင်ရန် အလားအလာကောင်းများ ရှိနေပြီဆိုသည့် အချက် ပင်ဖြစ်ပါသည်၊

မြန်မာအစိုးရသစ်၏ ချမှတ်ပြဌါန်းထားသည့် မူဝါဒများကို မှန်ကန်စွာ အကောင်အထည်ဖော်ရန် အခက်အခဲကြီးများနှင့် ရင်ဆိုင်နေရခြင်း၊ ကိုယ်ဖော်သည့်ဆေးကို ကိုယ်မစားဝံ့သလို ဖြစ်နေချိန်တွင် ပြင်ပအကူအညီများ မရလျှင်မဖြစ်နိုင်တော့သည့်အခြေအနေဆိုက်နေချိန်လည်း ဖြစ်နေပါသည်၊ ဒါကြောင့် အတိုက်အခံတွေ မရဘူးတဲ့ လိုက်လျှောမှုများ လုပ်လာနေရတဲ့အခါမျိုးလည်း ဖြစ်နေပါသည်၊



တပြိုင်နက်တည်းမှာ အစိုးရနှင့် အတိုက်အခံများကို ထိရောက်စွာကူညီပံ့ပိုးပေးနိုင်သည့် နိုင်ငံတကာ အင်အားစုကြီးများ ကလည်း အစိုးရသစ်နှင့် အင်အယ်ဒီကို ပေါင်းစည်းညီညွတ်စွာ မြန်မာနိုင်ငံတော်သစ်ကို တည်ဆောက်ရန် လိုလား တောင်းတနေသည့် အတွက် အလွန်လှပ နုညံ့သည့် နိုင်ငံ ရေးအခင်း အကျင်းသစ် တခုဟု ဆိုနိုင်ပါသည်၊



မြန်မာပြည်ပြုပြင်ပြောင်းလဲရေးတွင် အတိုက်အခံဆိုသူများ အားလုံး၏ လက်လှမ်းမီနိုင်သည့် အကောင်းဆုံး အနေအထားဆိုလျှင် မှားမည် မဟုတ်ပါ၊
ဒီအခြေအနေကို အမိအရဆုတ်ကိုင်ပြီး ရွေးကောက်ပွဲဝင်ရန် မှတ်ပုံတင်ဖို့ လိုအပ်ပါသည်။



မအောင်မြင်သည့် ထာဝရတော်လှန်ရေးအယူအဆသည် ပြည်သူကို သတ်နေသည့် အယူအဆမှို့ လက်လွတ်ရန် လိုပါသည်၊

စစ်အာဏာရှင်ကို ယုံလို့ ပုံသည်မဟုတ်ဘဲ မယုံလို့ပေါင်းတာပင် ဖြစ်ပါသည်၊
စုတ်ပြတ်ပြီး အောက်တန်းကျသည့် ကိုယ့်ပြည်တွင်းရေး ကိုယ်ရှင်းမည့် အယူအဆကို မြောင်းပုတ်ထဲမှာ ထားရစ်ပြီး နိုင်ငံတကာ၏ အား၊ မဟာမိတ်တို့၏ အင်အားတို့နှင့်အတူ အကျိုးတူစီးပွားရေး၊ နိုင်ငံရေး တို့ကို ပူးပေါင်းဆောင်ရွက်နေသည့် ဂလိုဘယ်လိုက်ဇေးရှင်းခေတ်ကို အမှီလိုက်ရန်သာ ဖြစ်သည်။



ကြွေးပိနေသည့် ဂရိနိုင်ငံ ဝန်ကြီးချုပ်က နိုင်ငံတာကနှင့်အီးယူက ကူညီဖြေရှင်းသည့်မူကို ငြင်းပယ်လိုက်သဖြင့် ပြည်သူဆန္ဒခံယူပွဲ လုပ်မယ်လို့ ပြောလိုက်တဲ့အခါ နိုင်ငံတကာနှင့် သူ့ဝန်ကြီးတွေက ဆန့်ကျင်လိုက်တာကြောင့် ချက်ချင်းပြန်ပြီး ဆန္ဒခံယူပွဲကို ပယ်ဖျက်ကြောင်း ပြောခဲ့ရတာကို နမူနာအဖြစ် ကြည့်သင်ကြပါတယ်၊

နိုင်ငံတကာရဲ့ လိုလားချက်သည် ဘယ်လောက်အရေးကြီးတယ်ဆိုတာကို ပြသလိုက်တာပါ။

မြန်မာအတိုက်အခံတွေရဲ့ ကြားမှာလည်း အင်အယ်ဒီမှတ်ပုံတင်ရေး မတင်ရေးကိစ္စကြောင့် မကွဲသင့်ကြပါ၊

တိုက်ပွဲမှာ ကျဆုံးသူများ၊ စွန့်လွတ်အနစ်နာခံကြသူများ၏ မျက်နှာကို မကြည့်ဘဲ အစိုးရသစ်နှင့် ပေါင်းတယ်လို့လဲ မစွပ်စွဲသင့်ပါ၊

အစိုးရသစ်သည် အပေါ်ယံဟန်ပြ ပြုပြင်မှုများသာ လုပ်နေသေးသည်ကိုလည်း မငြင်းနိုင်သေးပါ၊

သို့သော် အတိုက်အခံတို့၏ အနုနည်းအကြမ်းနည်း စုံလင်လှသည့် တိုက်ပွဲသဏ္ဍန်အမျိုးမျိုး၏ ရလာဒ်များကိုလည်း မတွေ့ရသေးပါ၊
စစ်အစိုးရဟောင်းက ချမှတ်ခဲ့သည် ROAD MAP ခုနှစ်ချက်အတိုင်း အစိုးရသစ်၏ လက်ထက်အထိ မှန်မှန်ချီတက်နေသည်ကိုသာ တွေ့ရပါသည်။


ပြည်တွင်းပြည်ပ အတိုက်အခံတို့၏ သိသိသာသာတစ်မျိုး မသိမသာတစ်မျိုး ကိုင်စွဲကျင့်သုံးနေသည့် အယူဝါဒမှာ ပြည်ပအကူ အညီအပါဘဲ ကိုယ့်အားကိုယ်ကိုးရေး ဖြစ်နေသောကြောင့် မြန်မာ့ဒီမိုကရေစီရေးတိုက်ပွဲမှာ နှစ်ပေါင်းနှစ်ဆယ် ကျော်ကြာမြင့် ခဲ့ခြင်းပင် ဖြစ်ပါသည်၊



ဤအယူအဆမှာ အရင်းရှင်စနစ်နှင့် အနောက်မုန်း ဗမာကွန်မြူနစ်များ၏ အရိုးစွဲနေသည့် မှားယွင်းသည့် အယူအဆကြီးပါပေ၊
၎င်းအယူအဆမှားကြီးသည် ပြည်တွင်းပြည်ပ အတိုက်အခံအုပ်စုများနှင့် အင်အယ်ဒီပါတီကြီးထဲမှာပင် လွှမ်းမိုးချုပ်ကိုင် နိုင်စွမ်းရှိ နေပါသည်။



ဗိုလ်ချုပ်အောင်ဆန်းတို့ခေတ်က ပြည်ပကို ထွက်ပြီး ပရီပိုဇယ်မရှာပါ၊ ထိရောက်သည့် အကူအညီကိုသာ ရှာပြီး တိုက်ပွဲဝင်ပါသည်၊

ယနေ့ ပြည်ပထွက် အတိုက်အခံအဖွဲ့တွေကတော့ ထိရောက်မည့်အကူအညီမျိုးကို ရှောင်ပြီး ပရီပိုဇယ်စားကာ စစ်အာဏာရှင်ကို အကျိုးပြု သလို ဖြစ်ခဲ့ကြပါသည်၊
ပြည်သူလူထုအတွက် ဝမ်းနည်းဘွယ်ကောင်းလှပါသည်။



လက်ဝဲယိမ်း၊ အနောက်မုန်း၊ ကိုယ့်အားကိုယ်ကိုး အယူအဆရှင်များသည် မြန်မာ့ ဒီမိုကရေစီရေး လမ်းကြောင်းမှန်ကို မည်သို့ပင် အဟန့်အတားပြုနိုင်ကြ သည်ဖြစ်စေ အချိန်အကန့်အသတ် ကိုတော့ မကျော်နိုင်ကြ တော့ပါ၊
၂၀၁၁ ခု နှစ်ကုန်ပိုင်းကာလသည် အနောက်ဒီမိုကရေစီ အင်အားစုကြီးများ၏ ထဲထဲဝင်ဝင် ဝင်ရောက်ပြီး ဒီမိုကရေစီ စီးဆင်းရေး ရေစီးကြောင်း ဖောက်လုပ်နေကြပြီကို တွေ့နေရပြီဖြစ်ပါသည်။



အစိုးရသစ်ထဲမှာလည်းကောင်း အင်အယ်ဒီထဲမှာလည်းကောင်း နိုင်ငံတကာနှင့်အတူတူ ပူးပေါင်း ဆောင်ရွက်လိုစိတ် ရှိသူများသည်သာ ယနေ့မြန်မာ့ဒီမိုကရေစီရေး တိုးတက်ပြောင်းလဲမှုကို ဖော်ဆောင်နိုင်ပြီး လူထုကိုကယ်တင်ပါလိမ့်မည်၊
အစိုးရသစ်ထဲတွင်လည်းကောင်း အတိုက်အခံများထဲတွင်လည်းကောင်း နိုင်ငံတကာနှင့် ပူးပေါင်း ဆောင်ရွက်လိုစိတ် မရှိသူများနှင့် ခံစားချက်ကို ရှေ့တန်းတင်ပြီး အယူအစွဲကြီး သူများ ကိုယ်ကျိုးရှာသူများ ကတော့ တိုင်းပြည်နှင့်လူထုကို ကမ္ဘာနှင့် အဆက်ဖြတ်ပြီး နွံထဲသို့တွန်းပို့နေ သူများသာ ဖြစ်သွားပါ လိမ့်မည်။



သို့သော် သမိုင်းတစ်ခေတ် နောက်ကြောင်းပြန်မည် မဟုတ်တော့ပါ၊

အိုင်းပက်နှင့် မိုဘိုင်းခေတ်ကို လူငယ်တွေ ပိုင်ဆိုင်နေပါပြီ၊

သူတို့ ကမ္ဘာကို ပတ်ချင်နေကြပါပြီ၊
ဘယ်သူမှ မတားဆီးနိုင်ပါ၊ မြန်မာ့နိုင်ငံရေးမှာ နိုင်ငံတကာက မပါဝင်နိုင်အောင် နှစ်ပေါင်းနှစ်ဆယ်ကျော် တားဆီးနိုင်ခဲ့ကြသည့် အစိုးရနှင့် အတိုက်အခံထဲမှ မိုက်ခဲတို့ရေ “ မောင်မောင်နိုင်ပြီ ထင်လို့လား ” လို့ မေးခွန်းထုတ်ရပါတော့မည်။



ဒါကြောင့် ဒေါ်စုနှင့် အင်အယ်ဒီကို ရွေးကောက်ပွဲဝင်ရန် မှတ်ပုံတင်ဖို့ တိုက်တွန်းလိုပါသည်၊
လွှတ်တော်ထဲမှနေပြီး နိုင်ငံတကာနှင့် ဆက်ဆံ ဆက်သွယ်ခြင်းဖြင့် မြန်မာ့အရေးကို အကောင်းဘက်သို့တိုးတက် ပြောင်းလဲစေရန် ဆောင်ရွက် နိုင်ကြမည်သာ ဖြစ်ပါကြောင်း။ ။



- ဦးဖိုးသာအောင်
06.11.11၊